Ormoc nangandam na alang sa ika-duhang hugna sa ESA

ANG lokal nga pangagamhanan misumiter na sa Department of Social Welfare and Development Region 8 (DSWD-8) sa Memorandum of Agreement (MOA) nga gipirmahan ni Mayor Edward C. Codilla alang sa pagpanghatag sa ikaduhang hugna sa Emergency Shelter Assistance (ESA).

Sila City Administrator Francis Pepito ug City Legal Officer Ivan Verallo personal nga mitunol ni OIC Regional Director Nestor B. Ramos sa MOA. Nahilangkob sa maong MOA nga ihatag na ang balanse nga P14,286.75 ngadto sa mga nanag-iya og balay nga “totally damaged.”

Kahinumdoman nga ang Ormoc gigahinan og P689,369,934.25 isip bahin niini sa Comprehensive Rehabilitation Recovery Plan (CRRP). Bisan pa sa kadako sa maong kantidad kulang lang gihapon kadto tungod kay nadugangan ang ihap sa mga pamilya sa master list gikan 40,673 ngadto sa 52,325.

Resulta, naibanan og katunga ang benepisyong nahatag sa mga na-“totally damaged.” Inay nga P30,000 ang ila untang nadawat, nahimo na lang kini og P15,713.25 sa pasalig nga trabahuon ang paghatag sa balanse.

Sa paghuman sa pagpanghatag sa ESA niadtong niaging buwan, mihangyo si Mayor Codilla og pagtugot sa Sangguniang Panlungsod (SP) niadtong Oktubre 19 nga mu-entra na pag-usab og kasabutan sa DSWD alang sa ikaduhang hugna sa ESA. Gibutang sa MOA nga maghatag ang DSWD-8 og P414,087,162 kinatibuk-ang kantidad, igo paghatag og P14,286.75 matag usa.

Apan sa pakigpulong sa Committee on Social Welfare sa SP niadtong Nobyembre 9, miingon si Ramos nga P289,840,000 lang ang mahatag sa DSWD-8 nga igo lang para sa P10,000 matag usa. Hatagan pud og siyam ka sin ang mga benepisyaryo isip hulip sa napahak nga kantidad,.

Miingon pa si Ramos nga kung mupugos gyud sa P14,286.75 ang mga tawo, P10,000 lang ang ilang makubra. Mao nga mitambag siya nga dawaton na lang ang mga sin nga siguradong anaa na kaysa maghuwat pa sa napahak nga kantidad nga walay kasiguroan kung mahatag ba gyud.

Tungod niini, sila Konsehal Benjamin Pongos ug ingon man si Vincent Rama nga nangulo sa maong komitiba nagmando sa buhatan sa mayor sa pagsumiter og laing MOA diin nakabutang nga P15,000 ug siyam ka sin ang ihatag sa matag usa ka benepisyaryo.

Apan sa sesyon niadtong Nobyembre 19, ang pirmerong MOA nga giendorso ni Mayor Codilla diin ang P14,286.75 maoy ihatag ang giaprubahan sa konseho. Mao kadto ang MOA nga gidala nila Pepito ug Verallo sa DSWD-8 niadtong Nobyembre 24.

Miesplikar si Ramos nga mipabor siya sa paghatag og P10,000 ug sin tungod kay wala pa silay kuwarta niadtong panahona. “At that time wala pa mi additional allocation sa CRRP. After (na-) balance (na ang) tanan, (nasuta namo nga) may puwede pa namo i-allocate,” ingon siya.

Ang balanse nga gipasabot ni Ramos mao ang P492,652,903.75 nga savings sa CRRP gikan sa tibuok Sinirangang Bisayas. Tungod niini, iya kunong tun-an kung ang P414,087,162 nga gikinahanglan alang mahatag ang tibuok P14,286.75 mahimo bang kuhaon sa maong savings sa CRRP.

Kung gali matuman kini, ang Ormoc maoy makadawat og pinakadakong alokasyon sa CRRP nga mukabat og P1,104,099,997, labaw pa og 36.5% sa P700 milyones kapin nga nagasto sa Tacloban nga maoy nagrabehan og pagmaayo sa bagyong Yolanda diin sobra sa 10,000 ang namatay kumpara sa 35 lang dinhi.

Gihikay nila City Legal Officer Ivan Verallo ug City Administrator Francis Pepito ang mga papeles nga isumiter kang DSWD OIC Regional Director Nestor Ramos kabahin sa pagpanghatag sa ika-duhang hugna sa ESA.