 |
| Si Mona Simban Limbona dihang naigo siya og bala samtang nakigpinusilay sa kapulisan. |
PATAY
ang gituhoang drug lord sa gihimong
operasyon sa nagkalain-laing ahensya sa kapulisan. Si Mona Simban G. Limbona
dugay na nga anaa sa order of battle sa Philippine National Police tungod sa mga kaso niyang adunay
kalabutan sa ginadiling drogas diin ikapila na siya nadakpan apan makapiyansa
lang gihapon.
Niadtong
Setyembre 3 sa 9:20 sa buntag, gironda ang balay ni Limbona sa Sitio Canipaan,
Tambulilid nga adunay distansya nga 3.8 kilometro gikan downtown. Ang mga pulis gikan sa Criminal Investigation and Detection Group-Special Operations Team,
Regional Public Safety Battalion, Regional Intelligence Unit ug ingon man Ormoc Police Office.
Nagbaon og search warrant ang mga
pulis tungod
sa paglapas ni Limbona sa Akta Republika 10591 kon illegal possession of firearms. Apan inay nga mu-surrender, misukol hinuon ang
gikatahapan ug nakigpinusilay sa mga operatiba. Nisibat siya sa kasagbotan luyo
sa iyang balay diin siya napusilan.
Gidali
si Limbona sa Ormoc District Hospital apan
gidelarar siya nga patay na nga miabot.
Nakuha
gikan sa iyang posesyon mao ang Taurus
.9mm pistol nga dunay sulod nga lima ka bala ug duha ka pakete sa shabu.
Nakuha pud sa sulod sa iyang balay mao ang duha ka kal.45 nga pistol apil tulo
ka magazine assembly ug mga bala para
sa maong armas, granada, ug mga kahimanan pagsuyop sa shabu. Duha ka lalaki ang nadakpan nga mao sila si
Dindo T. Butod, 30-anyos; ug ingon man si Nicky I. Rosal, 27 tungod sa paglapas
sa Akta Republika 10591. ni Dante Raden
No comments:
Post a Comment