Pagpanghatag sa ikaduhang hugna sa ESA pagasugdan na sa Disyembre 22

Gitunol mismo ni DSWD Regional Director Nestor Ramos
ang tseke alang sa ika-duhang hugna sa ESA para sa
Ormoc. Si OIC City Treasurer Delia Vilbar maoy midawat
sa tseke. (Hulagway kuha ni Dante Raden)

PAGAHIMUON na gayud ang pagpanghatag sa ikaduhang hugna sa Emergency Shelter Assistance (ESA) human nadawat sa lokal nga pangagamhanan ang kantidad alang sa maong katuyoan gikan sa Department of Social Welfare and Development (DSWD) niadtong Disyembre 18 sa hapon. 

Si DSWD Regional Director Nestor Ramos mismo ang mitunol ni OIC City Treasurer Delia Vilbar sa tseke nga nagkantidad og P414,087,162 nga iapud-apod sa 28,984 nga pamilya nga nagub-an og mga balay sa bagyong Yolanda. Kada benepisyaryo makadawat og P14,087,162.

Tungod kay daghang adlaw nga walay trabaho karong buwana, gibana-bana nga 18 lang ka barangay ang mahatagan. Gikasubo sa administrador sa syudad nga si Atty. Francis Pepito nga siyam lang ka barangay ang mahatagan sa ESA sa dili pa mag-Pasko, apan mipasalig siya nga mahatagan ang tanang barangay sa dili pa mag-election ban sa Enero 29, 2016.

Ugma, Disyembre 22, upat ang pirmerong barangay nga mahatagan. Gi-schedule sa buntag ang RM Tan ug Libertad samtang ang Lao ug Mas-in sa hapon.

Sa Disyembre 23, Miyerkules, naka-schedule ang San Juan, Mabato ug Nueva Sociedad sa buntag samtang sa hapon mao ang Airport, Green Valley ug Licuma.

Ang sunod nga pagpanghatag mao si Disyembre 28, Lunes diin ang San Vicente, Manlilinao ug Domonor ang gi-schedule sa buntag, ug sa hapon mao ang Leondoni ug Lilo-an.

Ang pinaka-ulhing pagpanghatag karong tuig pagabuhaton sa Disyembre 29, Martes diin ang Curva gi-schedule sa buntag ug sa hapon mao ang Margen ug Esepranza.