Balita kabahin sa 2 ka kawaning adik nga wa taktaka gumikan sa kapit sa LGU dakong butbot

USA ka sakop sa Disciplinary Action Committee (DAC) sa lokal nga pangagamhanan ang miingon nga butbot ang migula sa mantalaan nga nagbase sa Sugbo diin gibalita nga adunay duha ka kawani sa syudad nga nagpositibo sa drogas apan wala taktaka gumikan kay lakas og kapit sa administrasyon.

Ang maong sakop sa komitiba nga dili buot magpaila miingon nga dakong bakak ang maong balita tungod kay wala pa sila magpagula og silot nga ipahamtang sa mga kawani nga nagpositibo sa drogas.

Tumo-tumo gihapon ang pagpangalan sa mga akusado, puno pa niya, tungod kay gisikreto nila ang pagkatawo sa mga kawani aron dili sila mapakauwawan lakip na ang ilang mga pamilya isip pagtuman sa prinsipyo sa pagkainosente sa akusado samtang wala pa mapamatud-an ang iyang salaod.

Gidayeg sa atong source si Mayor Edward Codilla sa pagmugna sa DAC nga wala mahimo sa mga nangaging mayor. Ang maong komitiba gipamunoan sa administrador sa syudad nga si Francis Pepito ug gilangkoban sa mga tigdumala sa nagkalain-laing departamento sa City Hall lakip na ang mga piniling kawani. Ang DAC maoy gitahasan nga mugsusi ug mudungog sa mga kaso kabahin sa pagpabadlong sa mga opisyal ug kawani sa kagamhanan.

Bisan pa nagpositibo ang mga kawani sa drogas, muagi gihapon og proseso ang ilang kaso. Sa pangutana nganong nadugay sila magpagula og hukom, mitubag ang source nga nagsubay sila sa proseso nga gihan-ay sa Revised Rules on Administrative Cases in the Civil Service.

Gisaysay niya ang dagan sa maong proseso. Sa kaso sa pirmerong drug test, gihimo kini niadtong Agosto 4, 2014. Pagka-Setyembre 15, gihatagan og show cause order ang unom ka kawani nga nagpositibo sa drogas diin gihatagan sila og higayon nga mosumiter sa ilang tubag.

Human makakuha og igo nga mga ebidensya, mi-endorso ang DAC sa mayor nga pasakaan og kasong grave misconduct ang mga akusado. Nadawat sa mga akusado ang impormasyon kabahin sa ilang kaso Setyembre 22 ug gidungog kini Oktubre 8. Pagka Nobyembre 13, gipagula ang hukom diin gitangtang ang mga akusado sa serbisyo. Mi-apelar ang usa ka nila apan gi-deny kini pagka-Disyembre 13.

Ang ikaduhang drug test gihimo nianang Setyembre 8, 2014 ug ang ikatulo pagkasunod semana sa Setyembre 15. Tulo ka buwan kasagaran mudagan ang proseso apan nalangan pagpagawas og hukom sa ikatulong drug test tungod kay gihuman pa sa DAC ang kaso sa ikaduhang batch.

Tungod sa gihimong mga drug tests, unom ka kawani ang nataktak sa pirmerong batch ug lima sa ikaduha. Masaligon ang DAC nga tumanon ni Mayor Codilla ang hukom nga ipagula nila para sa ikatulong batch. Gawas sa mga kaso sa droga, aduna pay laing tulo ka kaso ang gidungog sa DAC apil na niini ang pagpangulata sa bantay sa Civil Security Unit sa isigka-kawani niini.

Sa tanan nga nahimong mayor sa syudad, si Mayor Codilla maoy kinadaghanan nga gipataktak nga mga kawaning badlungon – 12 ka buok. Dinhi makita ang iyang pagka-madisiplinahon ug nagtuo ang source nga angay kini daygon sa mga Ormocanon.